Հայաստանի ու Ադրբեջանի նախագահներ Ռոբերտ Քոչարյանն ու Իլհամ Ալիեւը անհրաժեշտ են համարում շարունակել Լեռնային Ղարաբաղի հակամարտության կարգավորման գծով բանակցությունները: Ինչպես Վարշավայից հաղորդել են հայկական ԶԼՄ-ների թղթակիցները, այդ մասին նախագահները հայտարարել են Լեհաստանի մայրաքաղաքում երեկ կայացած առանձնազրույցի արդյունքներին նվիրված ճեպազրույցի ժամանակ: Ռոբերտ Քոչարյանը նշել է, որ անմիջական շփումների համար կօգտագործվեն տարբեր միջազգային միջոցառումներ: Միեւնույն ժամանակ նա հանդես է եկել ղարաբաղյան խնդիրը լուծելու համար երկու երկրների արտգործնախարարների հանդիպումների ինտենսիֆիկացման օգտին: Նրա խոսքերով, արդեն մայիսին նախատեսվում է Վարդան Օսկանյանի եւ Էլմար Մամեդյարովի հերթական հանդիպումը: Իր հերթին Իլհամ Ալիեւը գնահատել է բանակցությունները իր հայ գործընկերոջ հետ որպես «կառուցողական երկխոսություն», որը վկայում է հակամարտության կարգավորման ուղիների որոնման երկուստեք գործադրվող ջանքերի մասին: