Երևանի քաղաքապետի տեղակալ Վանո Վարդանյանը հանդիպել է Երևանը գրքի համաշխարհային մայրաքաղաք հռչակելու տոնակատարություններին մասնակցելու առիթով Երևան ժամանած Մինսկի պատվիրակության ղեկավար, քաղգործկոմի նախագահի տեղակալ Իգոր Կարպենկոյի հետ:
Քաղաքապետ Տարոն Մարգարյանի անունից ողջունելով հյուրերին` Վանո Վարդանյանը շնորհակալություն է հայտնել Մինսկի պատվիրակությանը Երևանը գրքի համաշխարհային մայրաքաղաք հռչակելու տոնակատարություններին մասնակցելու համար: Երևանի քաղաքապետի տեղակալը նշել է, որ Երևանը կարևորում է Մինսկի հետ բարեկամական և գործընկերային հարաբերությունների ընդլայնումը, ինչպես նաև քաղաքային տնտեսության տարբեր ոլորտներում համատեղ հստակ ծրագրերի իրականացումը:
Շնորհակալություն հայտնելով ջերմ ընդունելության համար, Իգոր Կարպենկոն նշել է, որ հիացած է Երևանով, տոնական միջոցառումներով ու հյուրասեր երևանցիներով. «Հրաշալի տպավորություններով եմ հեռանալու Երևանից: Ձեր մայրաքաղաքն իսկապես տոնական էր թե հանդերձանքով, թե ջերմ մթնոլորտով»,-նշել է Մինսկի քաղգործկոմի նախագահի տեղակալը` ընդգծելով, որ գործընկերային կապերի էլ ավելի ամրապնդումն ուղղակի անհրաժեշտություն է:
Իգոր Կարպենկոն Վանո Վարդանյանին է փոխանցել Մինսկի քաղգործկոմի նախագահ Նիկոլայ Լադուտկոյի Երևանի քաղաքապետ Տարոն Մարգարյանին հղված ջերմ ողջույնները և Մինսկ այցելելու պաշտոնական հրավերը:
