Հայաստանում ձևավորվել է «Լևոնաքոչարյանական» միություն, որի նպատակն է «նարնջագույն հեղափոխության» իրականացումը երկրում և Հայաստանի արտաքին քաղաքական կուրսի փոփոխությունը: Այդ մասին Երևանում կայացած մամլո ասուլիսում հայտարարել է «Սահմանադրական իրավունք» միություն» կուսակցության ղեկավար Հայկ Բաբուխանյանը: Ըստ նրա, այդ միության մեջ Լևոն Տեր-Պետրոսյանի նպատակն է կյանքի կոչել այն արտաքին քաղաքականության կուրսը, որը նա վարում էր 1988թ. ի վեր, իսկ Ռոբերտ Քոչարյանի նպատակն է՝ կրկին իշխանության գալ:

«Մեզ նարնջագույն հեղափոխություն պետք չէ: Մենք արդեն ունեցանք նման հեղափոխություն 1990-91թթ., որից հետո 10 տարի չէինք կարողանում ուշքի գալ՝ սով, արտագաղթ»,-ասել է նա՝ հորդորելով ՀԱԿ-ին, արտագաղթի մասին խոսելիս, չմոռանալ իրենց իշխանության օրոք տեղի ունեցած արտագաղթը, երբ երկրից մոտ մեկ միլիոն մարդ հեռացավ:

Բաբուխանյանը հավելել է, որ «Լևոնաքոչարյանական» միությունը հիմա դուրս է եկել նախագահ Սերժ Սարգսյանի շուրջ ի դեմս ՀՀԿ ընտրացուցակի ձևավորված Ժողովրդական ճակատի դեմ և փորձում է ապակայունացնել իրավիճակը երկրում ու լարվածություն ստեղծել՝ կասկածի տակ դնելով առաջիկա ընտրությունների արդյունքները:

Նա նշել է, որ Ժողովրդական ճակատին հարկավոր չեն ընտրախախտումներ, քանի որ դրանք կարող են ստվերել ընտրությունները, որտեղ նրանք վստահ հաղթանակ են տանելու՝ հավաքելով քվեների բացարձակ մեծամասնությունը: --ԿԱ-

Հայկ Բաբուխանյան. «Լևոնաքոչարյանական» ուժերը մտադիր են «նարնջագույն հեղափոխություն» իրագործել Հայաստանում