Լեռնային Ղարաբաղը պատրաստ է բանակցել Ադրբեջանի հետ ցանկացած ձեւաչափով` «Հայաստանի եւ ԵԱՀԿ Մինսկի խմբի մասնակցությամբ, այնպես էլ առանց նրանց»: Այդ մասին այսօր Ստեփանակերտում հայտարարել է ԼՂՀ նախագահ Արկադի Ղուկասյանը: Նրա խոսքերով, Ադրբեջանը ստիպված կլինի բանակցությունների սեղանի շուրջ նստել Լեռնային Ղարաբաղի հետ, «քանի որ այլ ճանապարհ չկա»: Նշելով, որ կողմերին դեռեւս չի հաջողվել փոխըմբռնման հասնել, Արկադի Ղուկասյանը բացատրել է դա ավանդույթների եւ շփման մշակույթի բացակայությամբ, որի համար, նրա խոսքերով, ժամանակ է պետք: Միեւնույն ժամանակ, նա նշել է, որ «ղարաբաղյան կողմը մտադիր է աշխատել կառուցողական ոճով»: