Մայիսի 21-ին Կ. Ստանիսլավսկու անվան ռուսական դրամատիկական թատրոնում սիրված դերասանուհի Մարի Ռոզ Աբուսեֆյանը (ԱՄՆ) հայ հանդիսատեսին կներկայացնի «Տիգրան մեծ» երկու գործողությամբ մենաներկայացումը:
Ինչպես հայտնում են Ստանիսլավսկու անվան թատրոնից, պիեսի հեղինակը և բեմադրիչը հենց դերասանուհին է:
Ներկայացումը հիմնված է Պերճ Զեյթունցյանի «Աստծո տասներկու օրը» պիեսի, հայոց պատմության և Աբուսեֆյանի մտորումների ու վերլուծություննների վրա: Ներկայացման մեջ դերասանուհին կմարմնավորի 14 կերպար:
Մարի Ռոզ Աբուսեֆյանը անցած տարի Երևանում ներկայացրել է Ֆ.Վերֆելի «Մուսա լեռան 40 օրերը» մենաներկայացումը:
Դերասանուհի Մարի Ռոզ Աբուսեֆյանը թատերական կրթությունը ստացել է Երևանի գեղարվեստա-թատերական ինստիտուտում: Երկար տարիներ աշխատել է Երևանի Հր. Ղափլանյանի անվան դրամատիկական թատրոնում: Բազմաթիվ դերեր է ստանձնել հեռուստատեսային և ռադիոյի գրական-թատերական հաղորդումներում, նկարահանվել է «Հայֆիլմում»:
1983թ-ից ապրում է Սան Ֆրանցիսկոյում:
