Նախօրեին, ինչպես և կանխատեսվում էր, նախագահական նստավայրում կայացել է Սերժ Սարգսյան-Գագիկ Ծառուկյան հանդիպումը, որի ընթացքում քննարկվել են կոալիցիա կազմելուն վերաբերող հարցեր: Թերթի փոխանցմամբ` ԱԺ ԲՀԿ խմբակցության պատգամավոր Նաիրա Զոհրաբյանը հաստատել է հանդիպման փաստը, բայց և ասել, որ կոալիցիա կազմելու վերաբերյալ որևէ համաձայնություն ՀՀԿ-ի և ԲՀԿ-ի միջև, այս պահի դրությամբ, չի կայացվել: Թերթի տեղեկություններով` Սերժ Սարգսյանը վերջին օրերին հանդիպումներ է ունեցել նաև ՕԵԿ ղեկավար Արթուր Բաղդասարյանի և ՀՅԴ բյուրոյի ներկայացուցիչ Հրանտ Մարգարյանի հետ: «Լուրեր կան նաև, որ նմանատիպ հանդիպում է կայացել նաև «Ժառանգություն» կուսակցության ներկայացուցիչների հետ»,- գրում է թերթը: