Կասկադի համալիրի առջև ներկայումս հավաքվել են մի խումբ երիտասարդներ, ովքեր հայրենասիրական երգեր են երգում` այդպիսով արտահայտելով իրենց վերաբերմունքն այսօր `21-ին նշվող մշակութային բազմազանության համաշխարհային օրը, Երևանում անցկացվող «Բազմազանության» շքերթի նկատմամբ։Այս մասին հաղորդում է PanARMENIAN.Net-ի թղթակիցը իրադարձության վայրից։
Երիտասարդները պնդում են, թե իրենց ակցիան ինքնաբուխ է.«Չենք եկել խոչընդոտելու «Բազմազանության» շքերթը։ Մենք մեզ համար քայլում էինք և հանկարծակի բազմաթիվ ծանոթ մարդիկ հայտնվեցին»,–ասաց խմբի անդամներից Վահեն` հավելելով, որ իրենք եկել են պարզապես երգելու ։
Երևանի ոստիկանության հասարակական կարգի ապահովման բաժնի պետ գնդապետ Եղիազարյանը երիտասարդներին զգուշացրել է չխաթարել հասարակական կարգը։
Ակցիայի կազմակերպիչներից Մարինե Մարգարյանը, ով ներկայացնում է «Հանրային տեղեկատվություն և գիտելիքի կարիք» հասարակական կազմակերպությունը լրագորղներին ասաց, որ իրենց «Բազմազանության» շքերթը ոչ մի կապ չունի համասեռամոլության հետ և սա պարզապես նախօրոք կազմակերպված մշակութային ակցիա է։
Մարինե Մարգարյանի խոսքով, շքերթի մասին սխալ ըմբուռնումը, պայմանավորված է ապատեղեկատվությամբ և վերջին շրջանում մի քանի անգամ հարձակման ենթարկված DIY ակումբի շուրջ ծավալված իրադարձություններով։
Ի դեպ, ակցիայի կազմակերպիչները ներկայացրել են մշակութային տեսարաններ, ազգային փոքրամասնություններ պատկերող պաստառներով։
Շքերթին դեմ արտահայտվող երիտասարդներից մեկը փորձել է խլել պաստառը կազմակերպչի ձեռքից։ Ոստիկանը հորդորել է երիտասարդին չխաթարել հասարակական կարգը։
Այսօր` մայիսի 21-ը մշակութային բազմազանության համաշխարհային օրն է, որի առթիվ Երևանում կազմակերպվել է «Բազմազանության» շքերթը։ Այն մեկնարկել է «Կասկադ» համալիրից և կավարտվի 17:00-ին Շառլ Ազնավուրի հրապարակում:
