Կրթության և գիտության նախարար Արմեն Աշոտյանն այսօր ներկա է գտնվել Երևանի թիվ 142 ավագ դպրոցի «Վերջին դասին»։ Նախարարության մամուլի ծառայության հաղորդմամբ, նախարարը շնորհավորել է շրջանավարտներին և մանկավարժներին տոնի առթիվ։
Նախարար Արմեն Աշոտյանը հույս է հայտնել, որ այսօրվա շրջանավարտներից շատերը իրենց ուղին կշարունակեն բարձրագույն և միջին մասնագիտական ուսումնական հաստատություններում և նրանց հաջողություններ մաղթել քննությունների ընթացքում:
Նա շրջանավարտներին ևս մեկ անգամ հորդորել է զերծ մնալ «պատանեկան տոնը մեծերի խնջույքի վերածելու անհարկի դրսևորումներից»:
«Ամեն ինչ գեղեցիկ է չափի մեջ: Մեզ համար առաջին հերթին կարևոր է ձեր անվտանգությունն ու առողջությունը: Հիշարժան և անմոռանալի օր ձեզ, սիրելի շրջանավարտներ»-դիմելով աշակերտներին` նշել է Արմեն Աշոտյանը:
Նախարարը մասնակցել է նաև դպրոցում կազմակերպված տոնական միջոցառմանը: