Աշխարհի հազվագյուտ թանկարժեք քարերից մեկը` Martian Pink մեծ վարդագույն ադամանդը Հոնկոնգում Christie’s աճուրդում վաճառվել է 17,4 մլն դոլարով, հաղորդում է BBC ռուսական ծառայությունը:
Երբևէ վաճառված ադամանդներից ամենախոշորի` 12 կարատ քաշով վարդագույն ադամանդի շուրջ լուրջ պայքար էր ծավալվել: Աճուրդի մեկնարկից յոթ րոպե անց հաղթեց անանուն գնորդը, որը հեռախոսով էր դրույք կատարում:
Վերջնական գինն անհամեմատ գերազանցել է աճուրդի կազմակերպիչների կանխատեսումները, որոնք ակնկալում էին թանկարժեք քարը վաճառել 8-12 մլն դոլարով:
Վաճառված թանկարժեք քարի հետ համեմատվող միակ վարդագույն ադամանդը պատկանում է բրիտանական թագուհի Եղիսաբեթին, որը քարը նվեր էր ստացել 1947 թվականին` որպես հարսանեկան նվեր, հաղորդում է աղբյուրը: