ԱՊՀ երկրների ինստիտուտի տնօրեն Կոնստանտին Զատուլինը մեկնաբանել է Սոչիում բնակվող հայերի ու օլիմպիական օբյեկտներում աշխատող չեչեն ու դաղստանցի բանվորների միջև բախումը: «Չեմ կարծում, թե խոսքը գնում է ինչ-որ մեկի չար կամքի կամ երկար ձեռքի մասին, որը բախում է հրահրում Սոչիի բնակչության, այդ թվում հայազգի, ու շինհրապարակներում աշխատողների միջև»,-ասել է նա Երևանում կայացած մամլո ասուլիսում:
Զատուլինը կոչ է արել այլ դրդապատճառներ այդ միջադեպերում չորոնել: Նա նշել է նաև, որ «անշուշտ, շինարարության վրա աշխատող մարդկանց ինչ-որ սուպերկոնտինգենտ չես համարի»: Ըստ նրա, Սոչիի օլիմպիական օբյեկտներում հիմնականում կովկասցիներ են աշխատում, քանի որ գործազրկությունն այդտեղ ավելի բարձր է, քան ՌԴ մյուս շրջաններում:
Արդեն մի քանի օր է Սոչիի Ադլերի շրջանում բախումներ են տեղի ունենում հայերի ու դաղստանցիների միջև: Ըստ պաշտոնական տեղեկությունների, հայ երիտասարդների համբերության բաժակը լցվել է և նրանք կռվի են բռնվել՝ պաշտպանելով հայ կանանց ու աղջիկների պատիվը:
