ԱՊՀ-ն հասել է «որոշակի սահմանագծի»` կամ ամրապնդում, կամ փլուզում: Այդ մասին այսօր հայտարարել է Ռուսաստանի նախագահ Վլադիմիր Պուտինը երկրի Անվտանգության խորհրդի նիստին: «Մենք գտնվում ենք այլընտրանքի առջեւ` կամ մենք կհասնենք ԱՊՀ-ի որակական ամրապնդմանը, կստեղծենք նրա հիմքի վրա իրապես աշխատող, աշխարհում ազդեցիկ տարածաշրջանային կառույց, կամ մեզ անխուսափելիորեն սպասում է այդ աշխարհաքաղաքական տարածության «փլուզում»,- ասել է Պուտինը: Նրա կարծիքով, իրադարձությունների զարգացման երկրորդ տարբերակի հետեւանքը կլինի հետաքրքրության անկումը Համագործակցության աշխատանքի հանդեպ նրա մասնակից-պետությունների շրջանում»: Այդ պատճառով, համոզված է Պուտինը, Ռուսաստանը իրավունք չունի թույլ տալու ԱՊՀ փլուզումը: Միեւնույն ժամանակ նա նշել է, որ Ռուսաստանը չունի ԱՊՀ դաշտում գործելու մենաշնորհ, թեեւ «մի շարք օբյեկտիվ պատճառներով Ռուսաստանը կար եւ մնում է ինտեգրման գործընթացների շարժիչ ուժը ԱՊՀ տարածքում: Նախագահը կոչ է արել օրինակ վերցնել ետխորհրդային տարածքում գործող այլ կազմակերպություններից` ՀԱՊԿ, ԵվրազՏՀ, ՄՏՏ, անվանելով այդ կառույցները «առավել դինամիկ»: