Արեւմտյան ոչ կառավարական կազմակերպությունների անհանգստությունը Բաքու-Թբիլիսի-Ջեյհան (ԲԹՋ) նավթամուղի շինարարության կապակցությամբ անհիմն չի: Այդ մասին Բաքվի «Էխո» թերթին հայտարարել է Ադրբեջանի Քաղաքացիական նախաձեռնությունների կենտրոնի ղեկավար Մայիս Գյուլալիեւը: Նրա կարծիքով` «նախ հարկավոր էր լուծել ղարաբաղյան հակամարտությունն Ադրբեջանում եւ ազգային փոքրամասնությունների հիմնախնդիրը Թուրքիայում, այնուհետեւ ձեռնամուխ լինել ԲԹՋ շինարարությանը: Այդ խողովակաշարի կառուցումը կհանգեցնի երկար ժամանակով այդ հակամարտությունների սառեցմանը, իսկ դա ելք չէ իրադրությունից»: Փորձագետը գտնում է, որ համաձայնվելով այդ նավթամուղի շինարարությանը` Ադրբեջանի իշխանությունները կորցրեցին ղարաբաղյան խնդրի արդարացի լուծման վերջին հնարավորությունը: «Այդ նախագիծը կհանգեցնի տարածաշրջանային հակամարտությունների, քանի որ ԲԹՋ կառուցումից հետո մենք մեծ թվով ահաբեկչական գործողությունների կբախվենք նավթամուղի ողջ երկայնքով: Եվ դա Ադրբեջանի իշխանություններին կստիպի Լեռնային Ղարաբաղը հանձնելու փաստաթուղթ ստորագրել»,- եզրակացրել է նա: