Ընդդիմադիր Հայ ազգային կոնգրեսի (ՀԱԿ) համակարգող Լևոն Զուրաբյանը մեկնաբանել է փողերի լվացման մեղադրանքով Սիվիլիթաս հիմնադրամի դեմ քրեական գործի հարուցման փաստը: Ըստ նրա, եթե Հայաստանը «նորմալ ժողովրդավարական, օրինական երկիր լիներ, դա կարող էր դիտարկվել որպես նորմալ գործընթաց: Այո, իրավապահ մարմինները կարող են վերահսկել ՀԿ-ների ֆինանսավորման օրինականությունն ու ըստ օրենքի պատժել այն մարդկանց ու կազմակերպություններին, որոնք խախտել են օրենքը»:

«Սակայն, քանի որ մենք ապրում ենք մի պետությունում, որի պատկերին լավ ենք ծանոթ և նախադեպեր եղել են, ես չեմ զարմանա, եթե պարզվի, որ այդ ամենը քաղաքական դրդապատճառներ ունի: Այսօր այսքանը»,-ասել է նա լրագրողներին: «Եթե լրացուցիչ գնահատականների կարիք լինի, ՀԱԿ-ը դա կանի»,-ասել է նա:

ՀՀ ԱԱԾ քննչական վարչության կողմից 25.05.2012թ. հարուցվել է քրեական գործ` հանցավոր ճանապարհով ստացված առանձնապես խոշոր չափերով եկամուտներն օրինականացնելու /փողերի լվացում/ դեպքով, նախատեսված ՀՀ քրեական օրենսգրքի 190-րդ հոդվածի 3-րդ մասի 1-ին կետի հատկանիշներով: Սիվիլիթասի դեմ հարուցված քրեական գործի հետևում ՀՀ ԱԳ նախկին նախարար Վարդան Օսկանյանը քաղաքական պատվեր է տեսնում: