Չինաստանը պատրաստ է մասնակցել Հայաստանի ենթակառուցվածքի զարգացմանը, հատկապես տրանսպորտի եւ էներգետիկայի ոլորտում: Այդ մասին Չինաստանի Պետխորհրդի վարչապետ Վեն Ցզյաբաոն հայտարարել է պետական այցով Պեկինում գտնվող Հայաստանի նախագահ Ռոբերտ Քոչարյանի հետ հանդիպման ժամանակ: Նա Հայաստանը անվանել է «Չինաստանի հուսալի գործընկեր» հարավկովկասյան տարածաշրջանում: Նշվել է, որ Երեւանը եւ Պեկինը համագործակցելու են գյուղատնտեսության, գինեգործության, տրակտորների արտադրության եւ զբոսաշրջության ոլորտներում: Վ.Ցզյաբաոն տնտեսական կապերի կարեւոր ուղղություն է համարել Երեւանի «Նաիրիտի» սարքավորումների եւ տեխնոլոգիայի բազայի վրա Չինաստանում սինթետիկ կաուչուկի համատեղ արտադրությունը: Հանդիպման ընթացքում արծարծել են նաեւ ռազմատեխնիկական համագործակցության հարցը: Նշենք, որ Ժողովրդական ներկայացուցիչների համաչինական ժողովի նախագահ Ու Բանգոյի հետ Հայաստանի նախագահը քննարկել է միջխորհրդարանական համագործակցության հեռանկարները: