Երևանի քաղաքապետարանը պարզաբանում է. Աբովյան 19 հասցեում` նախկին ապամոնտաժված տաղավարների վայրում երեկ սկսված շինարարական աշխատանքերը կատարվում են ստորգետնյա հասարակական սանհանգույցի վերակառուցման նպատակով:
Ինչպես PanARMENIAN.Net-ին հաղորդել են Երևանի քաղաքապետարանի լրատվական ծառայությունից, Երևանի քաղաքապետ Տարոն Մագարյանն Աբովյան 19 հասցեում ստորգետնյա հասարակական սանհանգույցի վերակառուցման հետ կապված` հանձնարարել է աշխատանքների իրականացման վայրում փակցնել համապատասխան տեղեկատվական ցուցանակ և միջոցներ ձեռնարկել իրազեկելու հանրությանն ընթացող աշխատանքների մասին:
«Աբովյան փողոցում մենք մեծ աշխատանքներ ենք տարել և որևէ կապիտալ շինարարություն այդտեղ չի ընթանում: Հաշվի առնելով Աբովյան փողոցում հետիոտների մեծ հոսքը` սեփականատիրոջ հետ համատեղ նախաձեռնվել են հասարակական սանհանգույցի վերակառուցման աշխատանքներ, որոնք կավարտվեն հնարավորին սեղմ ժամկետում»,-նշել է քաղաքապետը աշխատանքային հերթական խորհրդակցության ժամանակ:
Հիշեցնենք, որ երեկ Աբովյան 19 հասցեում, առանց համապատասխան ցուցանակի մի խումբ շինարարներ էքսկավատորի օգնությամբ մեծ փոս էին հասցել փորել:
Շինարարության պատասխանատուն լրագրողներին ասել էր, որ շինարարությունն իրականացնում է «ՍահակյանՇին» ընկերությունը, որը նախատեսում է այդ տարածքում սրճարան կառուցել:
Քիչ ուշ շինարարությունը կասեցվել էր, ակտիվիստ Լևոն Գալստյանի ահազանգով դեպքի վայր էին ժամանել ոստիկանները և համապատսխան արձանագրություն կազմել: