Արտահանմանն ուղղված արդյունաբերական քաղաքականության ռազմավարության շրջանակներում արդեն հաստատվել է 4-5 ծրագիր և միջոցառումների գրաֆիկ, որպեսզի դրանք իրականացվեն հատուկ ստեղծված Խորհուրդների կողմից: Այս մասին հուլիսի 23-ին Երևանում հայտարարել է ՀՀ էկոնոմիկայի նախարար Տիգրան Դավթյանը` ամփոփելով առաջին կիսամյակի արդյունքները:
Նախապատրաստված ռազմավարությունների թվում են կոնյակագործության և գինեգործության ոլորտները, դեղագործությունը, ոսկերչությունը, քննարկվում է նաև թեթև արդյունաբերության ոլորտը: «Դրանք այն ոլորտներն են, որոնք առաջնային կերպով ներկայացրել ենք հանրային, բիզնես-հասարակության և շահագրգիռ կողմերի քննարկմանը»,-ասել է նա:
Այս առնչությամբ նախարարը հավելել է, որ առաջիկա օրերին կկայանա Արդյունաբերական խորհրդի հերթական նիստը` ՀՀ վարչապետ Տիգրան Սարգսյանի մասնակցությամբ, որտեղ և կներկայացվեն մշակված ռազմավարական փաստաթղթերը: Նա նաև հավելել է, որ ՀՀ էկոնոմիկայի նախրարությունում կայացել են առանձին ոլորտների խորհուրդների նիստեր, որոնց ընթացքում մշակվել են այդ ռազմավարությունների վերաբերյալ միասնական մոտեցումներ:
