2012թ. վեց ամսում կառավարությունը բավարարել է ՓՄՁ շուրջ 4000 հայտ պետաջակցության շրջանակում: Այդ մասին հուլիսի 23-ին Երևանում կայացած մամլո ասուլիսում հայտարարել է ՀՀ էկոնոմիկայի նախարար Տիգրան Դավթյանը՝ ամփոփելով առաջին կիսամյակի արդյունքները:
Ընդ որում, նրա խոսքով պետաջակցություն ստացածների 93 տոկոսը մարզերի ձեռնարկություններ են, և միայն 7 տոկոսը՝ Երևանում: «Դա նշանակում է, որ մենք նախապատվությունը տալիս ենք այն ընկերություններին, որոնք մարզերում են գտնվում և իրականացնում ենք տարածքների հավասար զարգացման ծրագիրը»,-ասել է նա:
Նախարարը հավելել է, որ վեց ամսում ուղղակիորեն ֆինանսավորվել է 21 ՓՄՁ 1,3 մլրդ դրամ գումարով: «Մենք կշարունակենք աջակցությունն այս տարի և հաջորդ տարի, քանի որ այդ ծրագրերի մասնակիցների համար նոր հնարավորություններ են բացվում»,-ասել է Դավթյանը:
