Սփյուռքի նախարարությունում արդեն 2.5 ամիս գործող սիրիահայերի հետ տարվող աշխատանքները համակարգող աշխատանքային խմբին այս ընթացքում դիմել է 120 սիրիահայ:
Այս մասին PanARMENIAN.Net-ի թղթակցի հետ զրույցում ասաց աշխատանքային խմբի ղեկավար Ֆիդայ Զաքարյանը. «Աշխատանքային խմբի լիազորությունները սահմանափակվում են միայն Հայաստան եկած և սփյուքի նախարարության դիմած սիրիահայերի հետ տարվող աշխատանքով, Սիրիրայի հայ համայնքի հետ աշխատանքային խումբը կապեր չունի»:
Ըստ աշխատանքային խմբի ղեկավարի` սիրիահայերը նախարարությանը հիմնականում դիմում են առողջապահական, կրթական և վիզայի հետ կապված խնդիրներով. «4 ընտանիք մեզ դիմել է կացարանի հետ կապված խնդիրներով, մենք դիմել ենք միգրացիոն ծառայություն և 4 ընտանիքներն էլ ապահովվել են կացարանով»:
Զաքարյանը նշեց նաև, որ կան խնդիրներ կապված Սիրիայից հայրենադարձված հայ երեխաների դպրոցներ և մանկապարտեզներ հաճախելու հետ. «Այժմ հավաքվել է 1 տասնյակից բաղկացած սիրիահայ երեխաների խումբ, որոնց համար նախարարությունը 2-3 շաբաթանոց արևելահայերենի նախապատրաստական դասընթացներ կանցկացնի մինչև սեպտեմբեր ամիսը, երբ նրանք պետք է արդեն դպրոց հաճախեն Հայաստանում»:
