Մի քանի ժամ առաջ Ստեփանակերտի մշակույթի և երիտասարդության պալատում տեղի ունեցավ ԼՂՀ Ազգային ժողովի հատուկ նիստ՝ նվիրված Արցախի հանրապետության նախագահի պաշտոնամուտին, որին ներկա էին 33 պատգամավորներից 32-ը:
Երդում տալով ժողովրդին 17-րդ դարի Ավետարանի և ԼՂՀ Սահմանադրության վրա նախագահ Բակո Սահակյանը նշել է. «Երդվում եմ՝ անվերապահորեն կատարել Սահմանադրության պահանջները, հարգել մարդու և քաղաքացու իրավունքներն ու ազատությունները, ապահովել հանրապետության ինքնիշխանությունը, անկախությունը, տարածքային ամբողջականությունը և անվտանգությունը` ի փառս Լեռնային Ղարաբաղի Հանրապետության և ի բարօրություն մեր ժողովրդի»:
Միջոցառմանը ներկա էին նաև ԼՂՀ երկրորդ նախագահ Արկադի Ղուկասյանը, ՀՀ կառավարական պատվիրակությունը՝ նախագահ Սերժ Սարգսյանի գլխավորությամբ, Աբխազիայի, Հարավային Օսիայի և Մերձդնեստրի հանրապետությունների պատվիրակությունները, հյուրեր ՌԴ-ից, ԱՄՆ-ից, Ֆրանսիայից, Լեհաստանից, Մերձավոր արևելքից և այլն։
Երդման արարողությունից հետո Բակո Սահակյանը Վերածննդի հրապարակում ընդունել է հանրապետության զինված ուժերի զորահանդեսը, հաղորդում է Karabakh-open.info-ն:
