Ընդդիմադիր «Ժառանգություն» կուսակցությունում ոչ մի քննարկում չի եղել այն մասին, թե ում բաժին կընկնի կուսակցության առաջնորդ Րաֆֆի Հովհաննիսյանի թափուր մնացած պատգամավորական մանդատը: «Տվյալ պահին ոչ ոք չի քննարկել այդ հարցը: Հիմա պետք է հաշվի առնել այն, որ տվյալ պահին մանդատին հավակնում է ցուցակի հաջորդ համարը (Թևան Պողոսյանը)»,- Երևանում մամլո ասուլիսում հայտարարել է «Ժառանգություն» կուսակցության գլխավոր քարտուղար Ստեփան Սաֆարյանը` մեկնաբանելով լուրերը, որ հենց նա կստանա Րաֆֆի Հովհաննիսյանի մանդատը:
Ազգային ժողովի նիստում ԱԺ նախագահ Հովիկ Աբրահամյանը տեղեկացրեց, որ «Ժառանգություն» կուսակցության առաջնորդ Րաֆֆի Հովհաննիսյանը դիմում է գրել պատգամավորական մանդատը վայր դնելու մասին: Ըստ ԱԺ կանոնակարգի` դիմումը ուժի մեջ կմտնի ներկայացնելու պահից սկսած 15 օրվա ավարտին պես, եթե պատգամավորը չցանկանա այն ետ վերցնել:
