Սեպտեմբերի 20-ին Հայաստանի պետական ֆիլհարմոնիկ նվագախումբը կնշի ՀՀ անկախության 21-րդ տարելիցը: Համերգը տեղի է ունենալու Արամ Խաչատրյան համերգասրահում` Երևանյան 6-րդ միջազգային երաժշտական փառատոնի շրջանակում: Համերգի ընթացքում տեղի կունենա Վաչե Շարաֆյանի «Լակրիմոսա» ստեղծագործության հայաստանյան պրեմիերան թավջութակի, երգչախմբի, սոպրանոյի և սիմֆոնիկ նվագախմբի համար:

Ինչպես մամուլի ասուլիսի ժամանակ ասաց Շարաֆյանը, ստեղծագործությունը գրվել է Վիգեն Չալդրանյանի «Մաեստրո» ֆիլմի համար, որը պատմում է կոմպոզիտորի և նվագախմբի մասին: Շարաֆյանը նշեց, որ շատ հուզիչ պահ է իր համար լինելու, քանի որ այն կկատարվի առաջին անգամ հայ հանդիսատեսի համար:

Ստեղծագործության մենակատարը թավջութակահար Սուրեն Բագրատունին է, որն ապրում է ԱՄՆ-ում: Սա երաժիշտի և կոմպոզիտորի առաջին համագործակցությունը չէ: Այժմ Բագրատունին աշխատում է սկավառակի վրա, որտեղ ձայնագրվելու են Շարաֆյանի ստեղծագործությունները:

Համերգում հնչելու է Շոստակովիչի թավջութակի առաջին կոնցերտը, ինչպես նաև Լիստի Դաշնամուրի առաջին կոնցերտը, Գլազունովի Ջութակի կոնցերտը և Ռավելի վալսը: