Սեպտեմբերի 21-ին Ուկրաինայի Տարաս Շևչենկոյի անվան օպերայի և բալետի ակադեմիական թատրոնում տեղի ունեցան հանդիսություններ նվիրված Հայաստանի Անկախության օրվան: Այս տարի Անկախության օրվան նվիրված ավանդական ընդունելությանը նախորդել է դասական երաժշտության համերգը:
Ինչպես հայտնում է Analitika.at.ua-ն, տոնական համերգին մասնակցել են Ուկրաինայի և Հայաստանի դասական երաժշտարվեստի ներկայացուցիչներ՝ Գերման Մակարենկոն, Սուսաննա Չախոյանը, Եվգենի Սավչուկը, Մարինե Մովսիսյանը, Արմեն Կոստանդյանը, Անդրեյ Դորոֆեև-Բաբայանցը: Հնչեցին Կոմիտասի, Առնո Բաբաջանյանի, Արամ Խաչատուրյանի, Արմեն Տիգրանյանի, Ալեքսանդր Սպենդիարյանի, Կարեն Խաչատուրյանի ստեղծագործությունները:
Միջոցառմանը ներկա էին կառավարության, Գերագույն ռադայի, Ուկրաինայի հայերի միության, մտավորականության և հասարակայնության ներկայացուցիչներ: