Հանրապետությունում ընթացող տեսչական բարեփոխումների շրջանակներում սեպտեմբերի 24-ին ՀՀ ԱԻՆ հրդեհային և տեխնիկական անվտանգության տեսչության պետ Ա. Մկրտչյանն ընդունել է Կանադայից ժամանած, տվյալների բազայի ստեղծման բնագավառի միջազգային փորձագետներ Ջեյմս Բրաունին և Էնդրյու Գուդվինին:
Ինչպես հայտնում է ԱԻՆ լրատվական ծառայությունը, հանդիպումը նվիրված էր անհրաժեշտ տեղեկատվության փոխանակման և պահպանման գործընթացների արդիականացմանը:
ՊՀ և ՏԱՏ պետ Ա. Մկրտչյանը ներկայացրեց համակարգի կառուցվածքը, տեսչությանը վերապահված գործառույթները, օրենքով սահմանված լիազորությունների շրջանակներում այլ նախարարությունների և կազմակերպությունների, այդ թվում` իրավապահ մարմինների հետ համագործակցության եզրերը։
Խոսելով աշխատակիցների միջին ծանրաբեռնվածության մասին` պարոն Մկրտչյանը շեշտեց, որ համակարգչային միջոցների լայն կիրառումը և նոր ծրագրերի ներդրումն ավելի վերահսկելի և թափանցիկ կդարձնեն ոչ միայն տեսուչի, այլև ողջ համակարգի գործունեությունը:
Հյուրերի` տեսչական աշխատանքի առանձնահատկություններին վերաբերող բազմաթիվ հարցերին տրվեցին սպառիչ պատասխաններ, և ձեռք բերվեց պայմանավորվածություն համագործակցության հետագա քայլերի վերաբերյալ: