«Բարգավաճ Հայաստան» կուսակցության քարտուղար Նաիրա Զոհրաբյանը վստահ է, որ ԲՀԿ բոլոր պատգամավորները մեկ մարդու նման կքվեարկեն ՀՀ ԱԳՆ նախկին ղեկավար Վարդան Օսկանյանին պատգամավորական անձեռնմխելիությունից զրկելու դեմ: Այդ մասին նա հայտարարել է լրագրողներին ԲՀԿ խմբակցության խորհրդակցությունից առաջ:
Ինչ վերաբերվում է այդ հարցի շուրջ այլ խմբակցությունների դիրքորոշմանը, ապա, Նաիրա Զոհրաբյանի խոսքով, նա ծանոթ չէ դրանց հետ: «Ցանկացած պատգամավոր կքվեարկի իր խղճից ելնելով: Քվեարկությունը փակ է, և ես հուսով եմ, որ կհաղթի տրամաբանությունը»,- նշել է նա:
«Ներկայացված մեղադրանքները ոչ մի հիմք չունեն և իրենց մեջ պարունակում են ուղիղ քաղաքական ենթատեքստ»,- ասել է նա:
ՀՀ գլխավոր դատախազ Աղվան Հովսեփյանը սեպտեմբերի 27-ին միջնորդությամբ դիմել էր ԱԺ՝ առաջարկելով պատգամավորական անձեռնմխելիությունից զրկել ԲՀԿ խմբակցության անդամ, ՀՀ ԱԳ նախկին նախարար Վարդան Օսկանյանին «Սիվիլիթաս» հիմնադրամի կողմից «փողերի լվացման» գործի հետաքննության շրջանակներում: