Հանրապետական և Բարգավաճ Հայաստան կուսակցությունների միջև եղած մրցակցությունը իրական է: Այսօր լրագրողների հետ հանդիպմանը նման կարծիք հայտնեց Տարածաշրջանային ուսումնասիրությունների կենտրոնի տնօրեն, քաղաքագետ Ռիչարդ Կիրակոսյանը: Քաղաքագետի խոսքով՝ այդ մրցակցությունը ավելի վառ կդրսևորվի, երբ կգա նախագահի թեկնածու առաջադրելու ժամանակը:
«Անցել է թատրոնի պահը և սպասվող ընտրությունները նախորդից կտարբերվեն: Այն ժամանակ ունեինք կեղծ, անհույս թեկնածուներ, այժմ արդեն Արտաշես Գեղամյանի նման թեկնածուներ չեն լինի»,- կանխատեսեց Կիրակոսյանը:
Ռիչարդ Կիրակոսյանը համոզված է, որ մրցակցությունը կպահպանվի անկախ նրանից ԲՀԿ-ն իր թեկնածուն կառաջադրի, թե ոչ: Ընտրությունների արդյունքներն, ըստ նրա, արդեն պարզ են: Սերժ Սարգսյանի հակառակորդին քաղաքագետը դեռ չի տեսնում: «Չկա այլընտրանքային թեկնածու, և գործող նախագահի սպասվող հաղթանակի պատճառը ոչ միայն իշխող կուսակցության վարչակազմային ռեսուրսն է, այլև կենսունակ այլընտրանքի բացակայությունը»:
Ինչ վերաբերում է ՀԱԿ- ԲՀԿ հնարավոր համագործակցությանը, Ռիչարդ Կիրակոսյանի բնորոշմամբ՝ նրանց պարը տանգո չէ, քանի որ նրանցից մեկը պարել չի ցանկանում: «Կասկածում եմ, որ կձևավորվի ՀԱԿ- ԲՀԿ դաշինք»,- եզրափակեց նա:
