20 հազար ԱՄՆ դոլարի դիմաց Բաքվում պայթյուն կազմակերպելու առաջարկով ՀՀ իրավապահ մարմիններին դիմած ազգությամբ տաջիկ Զամիրժոն Օտաժոնովը, որը վտարվել էր ՀՀ-ից, Բաքվում մամուլի ասուլիս է հրավիրել և հայտարարել է, որ միջազգային դատարանում հայտ է ներկայացնելու Հայաստանի կառավարության դեմ իր իրավունքները խախտելու և իրեն զրպարտելու համար:

Ադրբեջանական լրատվամիջոցների տարածած տեղեկություններով նա հայտարարել է, որ ՀՀ ԱԱԾ տարածած տեղեկությունները սուտ են:

PanARMENIAN.Net-ի թղթակցի հետ զրույցում ԱԱԾ մամուլի խոսնակ Արծվին Բաղրամյանը հրաժարվեց մեկնաբանություն տալ` նշելով, որ Օտաժոնովի գործողությունների մասին ԱԱԾ-ն իր բոլոր մեկնաբանություններն արդեն տվել է:

«Ի՞նչ ասես դրան», - ասաց նա:

Հիշեցնենք, որ ՀՀ իրավապահ մարմիններին Ուզբեկստանի քաղաքացի, ազգությամբ տաջիկ, 1979 թ. ծնված Զամիրժոն Օտաժոնովը դիմել էր սեպտեմբերի 24-ին: Նա իր առաջարկը հիմնավորել էր`ասելով, թե 2012 թ. ընթացքում աշխատել է Բաքվի շինարարական կազմակերպություններից մեկում, սակայն տվյալ կազմակերպության տնօրինությունը հրաժարվել է վճարել իրեն կատարված աշխատանքի դիմաց, ինչի պատճառով էլ նրա մոտ ատելություն է առաջացել ադրբեջանցիների հանդեպ: Ձեռնարկված օպերատիվ-հետախուզական միջոցառումների արդյունքում պարզվել է, որ վերջինս ՀՀ ԱԱԾ մարմիններին դիմել է Ադրբեջանի հատուկ ծառայությունների ուղղորդմամբ և նրա գործողությունները սադրանք են: Ադրբեջանական կողմի այս քայլերը նպատակ են հետապնդել միջազգային տարբեր ատյաններում և ԶԼՄ-ներում իրականացվող հակահայկական քարոզչությունում Հայաստանը ներկայացնել որպես ահաբեկչական գործողություններ կազմակերպող և հովանավորող երկիր: Ադրբեջանի համապատասխան մարմինները փորձել են ուղղակիորեն օգտագործել Զ. Օտաժոնովին` միջազգային հանրության շրջանում Ռամիլ Սաֆարովի շուրջ ստեղծված դժգոհության ալիքը մեղմելու նպատակով: