Լատվիան Հայաստանին դիտում է որպես լավ և մոտիկ բարեկամ Հարավային Կովկասում: Այս մասին Հայաստանի արտգործնախարար Էդվարդ Նալբանդյանի հետ համատեղ մամուլի ասուլիսի ժամանակ ասաց Լատվիայի Հանրապետության արտաքին գործերի նախարար Էդգարս Ռինկևիչսը: Լատվիայի արտգործնախարարը բարձր գնահատեց նախագահների և արտգործնախարարների մակարդակով հանդիպումները և հույս հայտնեց, որ բարձր մակարդակի վրա գտնվող երկխոսությունը կշարունակվի:
«Ես կցանկանայի նշել, որ մենք ողջունում ենք Հայաստանի արձանագրած առաջընթացը ԵՄ հետ համագործակցությունում: Այն կառուցողական է: Ինձ հետաքրքրեց Հայաստանի կարծիքը Սիիրայի և Իրանի շուրջ տեղի ունեցող զարգացումների վերաբերյալ»,- նկատեց Էդգարս Ռինկևիչսը:
Հայաստանի արտգործնախարարը տեղեկացրեց, որ հանդիպման ժամանակ լատվիացի իր գործընկերոջ հետ քննարկել են մի շարք հարցեր տնտեսական կապերին ավելի մեծ թափ հաղորդելու, ԼՂ խնդրի կարգավորման ուղղությամբ Հայաստանի ջանքերի և այլնի վերաբերյալ:
«Մենք ընդգծեցինք միջազգային սկզբունքների հիման վրա ԼՂ հարցի խաղաղ կարգավորման մեր դիրքորոշումը: Քննարկեցինք Միջին Արևելքում տեղի ունեցող տարածաշրջանային զարգացումները»,- ասաց Էդվարդ Նալբանդյանը:
Նոյեմբերի 14-16-ը ՀՀ արտաքին գործերի նախարար Էդվարդ Նալբանդյանի հրավերով պաշտոնական այցով Հայաստանում է գտնվում Լատվիայի Հանրապետության արտաքին գործերի նախարար Էդգարս Ռինկևիչսը:
