Բաքվի սահմանապահ ծառայությունը օդանավակայանի շենքից դուրս չի թողնում Ղազախստանի բջջային օպերատորներից մեկի հասարակայնության հետ կապերի ծառայության ղեկավար, ազգությամբ ադրբեջանցի Բայրամ Ազիզովին:

«Ես ժամանեցի Բաքու նոյեմբերի 19-ի գիշերը, մոտավորապես ժամը մեկին: Անձնագրային հսկողությունը, ինչպես սովորաբար է լինում, խնդրեց իմ անձնագիրը: Ինձ խնդրեցին սպասել, որից հետո տարան աշխատասենյակ, որտեղ ես խոսեցի Ադրբեջանի մաքսային ծառայության ներկայացուցչի հետ: Նա իր անունը չասաց: Նա հարցեր էր տալիս այն մասին, թե ես ով եմ, ինչու եմ եկել, որտեղ եմ աշխատում, ինչու եմ Հայաստան այցելել և այլն: Հեռախոսով խոսելուց հետո նա ասաց, որ ինձ թույլ չեն տա երկիր մուտք գործել և հետ կուղարկեն»,-պատմել է Ազիզովը: Ղազախստանցին ենթադրել է, որ մերժման պատճառ կարող է լինել նրա բազմակի այցերը Հայաստան: Սակայն ադրբեջանցի մաքսավորները դեռ պաշտոնական բացատրություն չեն տվել:

Ազիզովը դիմել Ադրբեջանի նախագահ Ալիևին՝ հաղորդագրություն թողնելով Twitter-ի նրա էջում: «Բարի օր: Ես Ղազախստանի քաղաքացի եմ: Երկրորդ օրն է գտնվում եմ Բաքվի օդակայանի տարանցիկ գոտում: Իմ անձնագիրը սահմանապահների մոտ է: Չեմ հասկանում պատճառը: Քնում եմ գետնին և արագ օգտագործման լապշա եմ ուտում: Փողերս վերջանում են: Ղազախստանի ԱԳՆ-ն իրազեկվել է»,-գրել է ղազախստանցին ու հավելել: «Ես էլ չեմ ուզում Բաքու, ես տուն եմ ուզում»:

Բայրամովի հետ արդեն կապվել են Ղազախստանի ԱԳՆ ներկայացուցիչները և ասել են, որ զբաղվում են այդ հարցով, հայտնում է Tengrinews.kz-ը:

Այսօր, նոյեմբերի 21-ին, մեկ օր ու գիշեր Բաքվի օդանավակայանում անցկացնելուց հետո Բայրամ Ազիզովը կվերադառնա Ղազախստան: Ըստ նրա, անձնագիրը նրան դեռ չեն վերադարձրել՝ ասելով, որ այն կհանձնվի Ղազախստանի պաշտոնատար անձանց: Ալմաթիի տոմսը նրան տրամադրել է «Էյր Աստանա» ընկերությունը: Ազիզովը կթռչի մոտակա չվերթով:

Ղազախստանի ԱԳՆ-ում ասել են, որ Ղազախստանը դիվանագիտական նոտա է ուղարկել Ադրբեջանին: Սակայն արձագանք դեռ չի ստացել: