«Առաջին ռաունդում Ռաֆայելն իրեն լավ չդրսևորեց, սակայն հետո ցուցաբերեց կամային հատկանիշներ և երկրորդում բեկեց հանդիպման ընթացքն ու հաղթեց»,- ասաց Հայաստանի վաստակավոր մարզիչ Գևորգ Միսակյանը, ով նաև Ռաֆայել Սիմոնյանի անձնական մարզիչն է:
Նրա սանը Երևանում ընթացող բռնցքամարտի երիտասարդական աշխարհի առաջնության նախնական մարտում մինչև 91 կգ քաշային կարգում 19:8 հաշվով հաղթել է վրացի Դաթա Քվիրքվելիին:
Ըստ մարզչի, ամենակարևորն այն է, որ իր սանը դժվարին պահին չհանձնվեց և երկրպագուներին չհիասթափեցրեց. «Եթե մյուս մարտերում էլ Ռաֆայելը նման կերպ գործի, անպայման կհաղթի»:
Հաջորդ մարտում Սիմոյանը կհանդիպի Ավստրալիան ներկայացնող Տապու Ջայի Օպետաիայի հետ: