Հայաստանի Հանրապետության Կենտրոնական ընտրական հանձնաժողովը ընդունեց ՀՀ նախագահի 2013 թվականի ընտրությունների նախապատրաստման և անցկացման ժամանակացույցը: ԿԸՀ նիստից հետո Տիգրան Մուկուչյանը, պատասխանելով լրագրողների հարցերին, ասաց, որ թանաքանյութերի հետ կապված խնդիրը վերացնելու համար այժմ լաբորատոր փորձաքննություն է իրականացվում .«Քանի որ ԱԺ ընտրությունների ժամանակ նման թանաքանյութ առաջին անգամ էր գործածվում, որոշակի խնդիրներ առաջացան, այս պահին թանաքանյութի 7 փորձանմուշ կա, որոնք լաբորատոր փորձաքննության փուլում են, աշխատանքներ են տարվում թերությունները շտկելու ուղղությամբ:Երբ ընտրվի վերջնական տարբերակը, կկանչենք լրատվամիջոցներին և լիակատար թափանցիկության պայմաններում կանցկացնենք փորձարկում, որպեսզի բացառենք բոլոր խնդիրները»,-ասաց ԿԸՀ նախագահը:
Հիշեցնենք, որ 2012 թվականի խորհրդարանական ընտրությունների ժամանակ թանաքանյութը անհետացել էր ընտրողների անձնագրերից, ինչից հետո ահազանգ եղավ կրկնակի քվեարկությունների մասին:
