Եվրոպական կենտրոնական բանկի ղեկավար Մարիո Դրագին Եվրախորհրդարանի տնտեսական և արժույթային հանձնաժողովի նիստում հայտարարել է, որ 2013-ին ակնկալում է տնտեսական անկման շարունակություն: Նրա խոսքով, տնտեսությունն աստիճանաբար կվերականգնվի միայն գալիք տարվա երկրորդ կեսին համաշխարհային պահանջարկի ամրապնդման, ճկուն դրամավարկային քաղաքականության և ֆինանսական շուկաներում զգալիորեն մեծ վստահության հաշվին, հաղորդում է «Ռոյթերսը»:
Դրագիի խոսքով, միասնական հսկիչ մեխանիզմը կնպաստի ողջ եվրագոտում բանկային հատվածի նկատմամբ վստահության վերականգնմանը: Այն կօգնի վերածնել միջբանկային և արտասահմանյան վարկերը, ինչը զգալի ազդեցություն կունենա իրական տնտեսության վրա:
Գնաճի մակարդակը գալիք տարի կնվազի և կկազմի 2 տոկոսից պակաս, կարծում է Եվրոպական կենտրոնական բանկի ղեկավարը:
