Վրաստանը միշտ էլ կարգավորող դեր է խաղացել Հարավային Կովկասում, երկուշաբթի օրը հայտարարել է Վրաստանի նախագահ Միխաիլ Սահակաշվիլին` ԵԽԽՎ ղեկավար Ժան-Կլոդ Մինյոնի հետ համատեղ ճեպազրույցի ժամանակ:
Վրաստանի նախագահն ընդգծել է, որ իր երկիրը ցանկանում է լավ հարաբերություններ ունենալ հարևան պետությունների հետ:
«Վրաստանը լավ հարաբերություններ է պահպանում ինչպես Հայաստանի, այնպես էլ Ադրբեջանի հետ: Կցանկանայի ընդգծել, որ սրանք պարզապես բառեր չեն, այլ ավելին: Վերջին տարիներին այդ հարաբերությունները ոչ միայն կառավարական մակարդակում են, այլև ժողովուրդների: Այս տարիների ընթացքում մեր ժողովուրդները ավելի են մտերմացել: Դրանով էլ չեզոքացվել են առկա կարծրատիպերը, մենք ավելի լավ ենք ճանաչել միմյանց: Ես լավատես եմ, սակայն անհրաժեշտ կլինի հաղթահարել որոշ արգելքներ»,-ասել է Սահակաշվիլին:
