Հունվարի 21-ին ՀՀ դեսպան Գագիկ Ղալաչյանը այցելեց Հունաստանի ազգային պաշտպանության ակադեմիա, ուր հանդես եկավ ակադեմիայի ունկնդիր բարձրաստիճան սպաների համար նախատեսված «Հայաստանի Հանրապետության արտաքին քաղաքականության անվտանգության մարտահրավերները» թեմայով դասախոսությամբ: Այս մասին հաղորդում է ՀՀ ԱԳՆ մամուլի ծառայությունը:
ՀՀ դեսպանը ներկայացրեց Հայաստանի արտաքին քաղաքականության ուղղությունները, հայ-հունական հարաբերությունների արդի փուլը, երկու երկրների ռազմական համագործակցությունը, պատասխանեց ներկաների հարցերին:
Շնորհակալական խոսքով հանդես եկավ ակադեմիայի պետ գեներալ-մայոր Գեորգիոս Սպիրոպուլոսը, որը նաև նշեց, որ անձամբ է ներգրավված եղել հայ-հունական ռազմական համագործակցության ոլորտում և այցելել է Հայաստան:
Դեսպան Գ. Ղալաչյանը գեներալ-մայոր Սպիրոպուլոսի ուղեկցությամբ շրջայց կատարեց ակադեմիայում:
