ՀԱՕԿ-ի նախագահ Գագիկ Ծառուկյանի որոշմամբ Երևանում անցկացվող բռնցքամարտի միջազգային ավանդական մրցաշարը, որը կրում է իր անունը, այսուհետ նվիրվելու է Օլիմպիական խաղերի չեմպիոն, Եվրոպայի և ԽՍՀՄ-ի եռակի չեմպիոն Վլադիմիր Ենգիբարյանի հիշատակին:

PanARMENIAN.Net-ի թղթակցի հետ զրույցում Հայաստանի բռնցքամարտի ֆեդերացիայի փոխնախագահ Դերենիկ Գաբրիելյանը նշեց, որ այս տարի մրցաշարը չի կայանալու: Պատճառն այն է, որ 2013 թվականի Եվրոպայի բռնցքամարտի առաջնությունը կայանալու է ապրիլի 30-ից մինչև մայիսի 9-ը Մինսկում, իսկ երևանյան մրցաշարը սովորաբար անցկացվում է գարնանը` մարտ կամ ապրիլ ամիսներին:

«Մեր մրցաշարը A կարգի է, և առնվազն 19 երկրների բռնցքամարտիկներ պետք է մասնակցեն: Մինչդեռ Եվրոպայի առաջնության հետ կապված նրանց մարզումային ծրագրերում փոփոխություններ են կատարվել, և մասնակիցների թվի կրճատում կլինի, ինչը բացասաբար կանդրադառնա մեր մրցաշարի վրա»,- ասաց Գաբրիելյանը:

Նա ընդգծեց, որ հնարավոր է փոխվի մրցաշարի անցկացման ժամկետը և այն կայանա աշնանը: