Սոցիալ դեմոկրատ Հնչակյան կուսակցությունը մայր կուսակցություն է, որը բարոյական իրավունք չունի որևէ ուրիշ կուսակցության հետ միաձուլվելու: Այս մասին այսօր լրագրողների հետ հանդիպման ժամանակ ասաց ՍԴՀԿ ղեկավար Գուրգեն Եղիազարյանը:
«Ինձ համար շատ անհասկանալի էր, թե ինչու ՀԱԿ-ը նախագահական ընտրություններում չառաջադրեց իր թեկնածուին»,- նշեց Եղիազարյանը և հավելեց, որ իրենք չկարողացան քանդել ավազակապետությունը, բայց կարողացան որոշակիորեն ազդել բանակում անհեթեթ սպանությունների վրա:
«ՀԱԿ-ում համախմբվել ենք մեկ գաղափարի շուրջ, այն է` քանդել ավազակապետությունը, բայց ցավոք մեզ չհաջողվեց, միայն ազգային ժողովում ունեցանք 7 տեղ», - նշեց Եղիազարյանը և հավելեց, որ իրենց խնդիրն է լրջագույն պայքարել ընդդիմադիր դաշտում:
«Լևոն Տեր-Պոտրոսյանի գիտելիքների շնորհիվ է, որ ՀԱԿ-ը 5 տարի գործում է: Առանց նրա դժվար է լինելու»,-ասաց ՍԴՀԿ ղեկավարը:
Գուրգեն Եղիազարյանը տեղեկացրեց, որ հաջորդ շաբաթ կկայանա ՍԴՀԿ ընդլայնված նիստ:
Երեկ Լևոն Տեր-Պետրոսյանն հայտարարեց, որ քաղաքական զանազան ուժերի ու անկուսակցականների ազատ դաշինքից Հայ ազգային կոնգրեսը կվերածվի մեկ միասնական կուսակցության, որը կլինի ազատական գաղափարներ դավանող կուսակցություն:
