Այսօր ՀՀ սփյուռքի նախարար Հրանուշ Հակոբյանն ընդունել է Բեյրութի Հայկազյան համալսարանի նախագահ Փոլ Հայտոսթյանին, նույն համալսարանի սփյուռքի ուսումնասիրությունների կենտրոնի տնօրեն Անդրանիկ Դաքեսյանին, լեզվաբան Անդրանիկ Եղիայանին, Ամերիկայի Միացյալ Նաhանգներում գործող «Diaspora» ամսագրի խմբագիր Խաչիկ Թեոլեոլյանին:
Նրանք Հայաստան էին եկել՝ մասնակցելու ՀՀ սփյուռքի նախարարության, ԵՊՀ սփյուռքագիտության ամբիոնի և Բեյրութի Հայկազյան համալսարանի սփյուռքի ուսումնասիրության կենտրոնի համատեղ նախաձեռնությամբ կազմակերպված «Հայկական ինքնության խնդիրները 21-րդ դարում» խորագրով գիտաժողովին:
Հ. Հակոբյանը ներկայացրել է նախարարության կողմից իրականացվող ծրագրերը: Նախարարի խոսքով՝ գիտական ուսումնասիրությունների մակարդակով են հետազոտվում Սփյուռքին վերաբերող խնդիրներն ու հարցադրումները: Հանդիպման ընթացքում քննարկվել են Հայկական Սփյուռքի առջև ծառացած մարտահրավերները. հայապահպանության, լեզվի պահպանության հիմնախնդիրները: Այս համատեքստում նախարարության իրականացրած հայրենաճանաչության, կրթական և մշակութային ծրագրերի ազդեցությունը միանշանակ նկատելի է աշխարհասփյուռ հայության՝ ազգային գաղափարախոսության շուրջ համախմբվելու հարցում:
Հյուրերը նախարարի հետ կիսել են Հայկական Սփյուռքում առկա հիմնախնդիրների վերաբերյալ իրենց մտահոգությունները: Անդրադարձել են նաև հայրենադարձված սփյուռքահայերին Հայաստանում ապրելու և հաստատվելու իրական հնարավորություններին:Հանդիպման ավարտին պայմանավորվածություն է ձեռք բերվել շարունակել ակտիվորեն գործակցել նախարարության ծրագրերի շրջանակներում, հատկապես՝ համահայկական նշանակության գաղափարների շուրջ համախմբվելու գործում:
