Ղարաբաղյան հակամարտության կարգավորման գործընթացն ընթանում է ճիշտ ուղղությամբ: Այդ մասին այսօր Երեւանում հայտարարել է ԵԱՀԿ Մինսկի խմբի ամերիկացի համանախագահ Սթիվեն Մանը: Նրա խոսքերով, չնայած Հայաստանի եւ Ադրբեջանի նախագահները, ինչպես նաեւ երկու երկրների արտգործնախարարները հստակ նշել էին իրենց բանակցային դիրքերը, նրանց հաջողվեց նեղացնել առկա հակասությունների շրջանակը: Իր հերթին, Եվրոպայի եւ Եվրասիայի հարցերով ԱՄՆ պետքարտուղարի օգնական Դենիել Ֆրիդը, պատասխանելով հակամարտության կարգավորման հեռանկարների մասին հարցին, ասաց, որ «չկա ավելի վտանգավոր բան, քան բանակցային գործընթացի ավարտի հնարավոր ժամկետը կանխատեսելը»: