Ապրիլի 1-4-ը Terra Viva Միջազգային բնապահպանական շարժման մասնակիցները շարժման նախագահ Նիկոլայ Դրոզդովի գլխավորությամբ Երևանում կանցկացնեն Միջազգային բնապահպանական հեռուստամարաթոն: Հեռուստամարաթոնին կմասնակցեն ՀՀ պրոֆիլային նախարարությունների ու գերատեսչությունների ներկայացուցիչները, գործարար ընկերությունների ղեկավարներ, գիտնականներ, լրագրողներ, ինչպես նաև ՄԱԿ ներկայացուցիչը Հայաստանում:
Հեռուստամարաթոնի գլխավոր թեման Սևանը ՅՈՒՆԵՍԿՕ-ի բնական հուշարձանների ցանկում ընդգրկելը կլինի:
Միջազգային բնապահպանների նախաձեռնությունը հնարավորություն կտա ՀՀ բնակիչների համար այդ սրբազան լիճը, որը քաղցրահամ ջրի ամենամեծ աղբյուրն է Կովկասում, պահպանել որպես եզակի բնական համալիր, կբարձրացնի այդ եզակի բնական օբյեկտի արժեքն աշխարհում, ասվում է Terra Viva-ի կայքում:
Հեռուստամարաթոնի ընթացքում կքննարկվեն երկու երկրների համագործակցության հարցերը զբոսաշրջության, բնապահպանական ձեռնարկատիրության, նորարար տեխնոլոգիաների ոլորտներում: Նախատեսվում է նաև կոչ անել ՄԱԿ-ին ընդգրկել Սևանը ՅՈՒՆԵՍԿՕ-ի բնական հուշարձանների ցանկում:
