Այսօր Հայաստանի խորհրդարանի խոսնակ Արթուր Բաղդասարյանը հանդիպել է ՌԴ Պետական Դումայի փոխնախագահ Նիկոլայ Կուպցովի եւ Դաշնության խորհրդի փոխնախագահ Ալեքսանդր Տորշինի հետ: Նրանք Երեւանում են գտնվում մասնակցելու համար Հայաստանի Հանրապետության Ազգային ժողովի 15-ամյակին նվիրված միջոցառումներին, հաղորդում է ՀՀ ԱԺ մամլո ծառայությունը: Հանդիպման ժամանակ քննարկվեցին հայ-ռուսական միջխորհրդարանական կապերի զարգացման խնդիրները: Հյուրերը Աժ նախագահին փոխանցեցին ՌԴ Պետդումայի նախագահ Բորիս Գրիզլովի եւ ՌԴ Դաշնության խորհրդի նախագահ Սերգեյ Միրոնովի շնորհավորանքները: Հայաստանի խորհրդարանի 15-ամյակը կարեւորվեց իբրեւ հետխորհրդային տարածքի երկրներում կարեւոր հասարակական-քաղաքական իրադարձություն, որ ամփոփում է մինչեւ այժմ անցած ճանապարհը: Անդրադառնալով սահմանադրության հանրաքվեին` կողմերն այն գնահատեցին իբրեւ Հայաստանի համար կարեւորագույն քաղաքական նշանակություն ունեցող իրադարձություն: Նշվեց, որ առաջիկայում տեղի կունենա միջխորհրդարանական համագործակցության հանձնաժողովի հետաձգված նիստը: Հանդիպման ընթացքում քննարկվեցին միջմարզային համագործակցության ընդլայնման խնդիրները, 2006-ին համատեղ կոնֆերանսի անցկացման հնարավորությունները: