«Երկու աշխարհով ճանապարհորդություն Գալուստ Սարգիս Գյուլբենկյանի հետ» խորագրով կոնֆերանս է տեղի ունեցել Փարիզում: Այն նվիրված է եղել Գալուստ Գյուլբենկյանի գործունեությանը: «Գյուլբենկյան» հիմնադրամի և «Երկու աշխարհ» պարբերականի կազմակերպած միջոցառման պատվավոր հյուրերն են եղել Ֆրանսիայում ՀՀ դեսպան Վիգեն Չիտեչյանը, ինչպես նաև Պորտուգալիայի ու Սինգապուրի դեսպանները:
Բացման խոսքով հանդես է եկել «Գյուլբենկյան» հիմնադրամի նախագահ Արթուր Սանտոս Սիլվան` ներկայացնելով հիմնադրամի ստեղծման նախապատմությունը, հիմնական նպատակները և Գալուստ Գյուլբենկյանի ունեցած դերը Պորտուգալիայի զարգացման գործում:
Այնուհետև ելույթներով հանդես են եկել «Երկու աշխարհ» պարբերականի տնօրեն Միշել Կրեպյուն, «Պարտեքս» նավթագազային ընկերության նախագահ Անտոնիո Կոստա Սիլվան և «Գյուլբենկյան» հիմադրամի կառավարման խորհրդի անդամ, Գալուստ Գյուլբենկյանի ծոռ Մարտին Եսայանը:
Բանախոսները ներկայացրել են էներգետիկ պաշարների օգտագործման ոլորտում ընթացող համաշխարհային գործընթացները, Գալուստ Գյուլբենկյանի անգնահատելի ներդրումը 20-րդ դարի էներգետիկ պաշարների կառավարման և գործարարության զարգացման գործում, ինչպես նաև անդրադարձել են «Գյուլբենկյան» հիմնադրամի մարդասիրական և բարեգործական լայնածավալ գործունեությանը:
Միջոցառման ավարտին դեսպան Չիտեչյանը մասնավոր հանդիպում է ունեցել բանախոսների հետ, որի ընթացքում քննարկվել են վերջիններիս կազմակերպությունների հետ համագործակցության հեռանկարները: Այս մասին տեղեկացնում են ՀՀ ԱԳՆ մամուլի, տեղեկատվության և հասարակայնության հետ կապի վարչությունից:
