Հայաստան-Սիրիա օդային հաղորդակցությունը վերականգնվում է: Դամասկոս-Ղամիշլի-Երևան երթուղով նոր չվերթ է բացվել: Այս մասին PanARMENIAN.Net-ի թղթակցի հետ զրույցում ասաց «Սիրիական ավիաուղիներ»-ի երևանյան գրասենյակի մենեջեր Սվետլանա Հովհաննիսյանը: «1-ին չվերթը նախատեսվում է ապրիլի 16-ին, ուղևորների թիվը դեռ հստակ չէ` 29 տոմս ձեռք են բերել Սիրիայում, իսկ Հայաստանում միայն ամրագրումներ են, բայց միայն երկուշաբթի հստակ թիվը պարզ կլինի»,- ասաց նա:
Դեպի Հալեպ չվերթների դադարեցումից հետո «Սիրիական ավիաուղիներ» ընկերությունն իրականացնում էր Դամասկոս-Լաթաքիա-Երևան չվերթներ, որոնք ևս անժամկետ դադարեցվել են: Այդ չվերթներից վերջինը կայացել է փետրվարի 5-ին. Երևան է ժամանել 75 ուղևոր, մեկնել`13:
Վերջին շրջանում Հալեպի օդանավակայանի շուրջ ընդդիմադիրների ու կառավարական ուժերի բախումները հաճախակիացել են: Լուրջ մարտեր են ընթանում օդանավակայանի վերահոսկողության համար: Իսկ ցամաքային ճանապարհները վտանգավոր են քաղաքից դուրս գալու համար: