Ավստրալիայի Նոր Հարավային Ուելսի խորհրդարանի օրենսդիր վեհաժողովը (ստորին պալատը) բանաձև է ընդունել Օսմանյան Թուրքիայում ասորիների, հույների ու հայերի ցեղասպանությունը ճանաչելու մասին: Անցած շաբաթ նման բանաձև ընդունեց խորհրդարանի վերին պալատը՝ Օրենսդիր խորհուրդը:
Նոր Հարավային Ուելսի վարչապետ Բարի Օ՚ Ֆարելի ներկայացրած բանաձևը պաշտոնապես ճանաչում է ասորիների ու հույների ցեղասպանությունն ու հաստատում է, որ Հայոց ցեղասպանությունը պատմական փաստ է:
«Այսօր պատմական օր է Նոր Հարավային Ուելսի համար, որը հերթական անգամ ցույց տվեց, որ հայերի, հույների ու ասորիների ցեղասպանությունը երբեք չի մոռացվի»,-հայտարարել է Ավստրալիայի Հայ Դատի հանձնախմբի գործադիր տնօրեն Վաչե Ղահրամանյանը: Նա շնորհակալություն հայտնեց Բարի Օ՚ Ֆարելին բանաձևը ներկայացնելու համար և Օրնեսդիր վեհաժողովի բոլոր անդամներին այն բանի համար, որ նրանք չուրացան ճշմարտությունը այս կարևոր հարցում:
