Թանգարանների միջազգային օրվա, թանգարանային գիշերվա առիթով մայիսի 18–ին Գաֆեսճէան արվեստի կենտրոնի մուտքը բաց է լինելու ժամը 10:00–ից մինչև կեսգիշեր: Այս մասին այսօր ասուլիսի ժամանակ տեղեկացրել է կենտրոնի հանրային կապերի և մարքեթինգի տնօրեն Լիլիթ Սոխակյանը:
«Նախատեսված են 2 նոր ցուցահանդես, 3 կրթական ծրագիր, կինոյի դիտումներ և այլ մշակութային միջոցառումներ: Մասնակիցները պետք է նախապես գրանցվեն»,– ասել է նա ու ավելացրել, որ յուրաքանչյուր միջոցառում ունի իր թիրախային խումբը:
Գաֆեսճէան արվեստի կենտրոնի հանրային ծրագրերի գծով փոխտնօրեն Աստղիկ Մարաբյանի խոսքով՝ ցուցադրություններից մեկում 1-ին անգամ կներկայացվի Pop Art շարժումը:
Գաֆեսճէան արվեստի կենտրոնի ցուցահանդեսները հիմնականում ներկայացնում են Ջերարդ Գաֆեսճէանի լայնածավալ հավաքածուն, որում գերակշռում են ժամանակակից արվեստի նմուշները։ Միայն 2012 թվականին թանգարանը շուրջ 1 մլն այցելու է ընդունել։
Ամեն տարի մայիսին Ֆրանսիայի մշակույթի նախարարության նախաձեռնությամբ, Եվրոպայի խորհրդի և ՅՈՒՆԵՍԿՕ-ի հովանավորությամբ անցկացվում է «Թանգարանների գիշեր» համաեվրոպական միջոցառումը: Հայաստանյան թանգարաններն այս միջոցառմանը մասնակցում են 2005 թվականից:
