Գազի գինը նվազեցնելու կամ սուբսիդավորելու հնարավորություններ գտնելու համար ռուսական կողմի հետ ընթացող բանակցությունները շարունակվում են, և այս պահին դեռ որևէ նոր բան չկա:
Այս մասին այսօր խորհրդարանում լրագրողների հետ ճեպազրույցի ժամանակ ասաց Էներգետիկայի և բնական պաշարների նախարար Արմեն Մովսիսյանը։ Նա նաև նշեց, որ ռուսական կողմի հետ բանակցում են նաև կառավարության կողմից գազի գինը 30%-ով սուբսիդավորման համար աղբյուրներ գտնելու շուրջ, որպեսզի դա գրանտային միջոցներևով փոխհատուցվի:
Իսկ այն պնդումներին, թե գազի գնի բարձրացումը եղել է ապրիլի 1-ից և այսօր ընթացող քննարկումներն անիմաստ են, նախարարն արձագանքեց, որ ինքը ասել է և կրկնում է, որ բանակցությունները վաղուց են սկսվել։ Արմեն Մովսիսյանն ընդգծեց, որ գազի գնի նոր սակագինը ուժի մեջ կմտնի այն ժամանակ, երբ Հանրային ծառայությունները կարգավորող հանձնաժողովը կհաստատի այն:
Ավելացնենք, որ Հայաստանի Հանրապետության հանրային ծառայությունները կարգավորող հանձնաժողովը նախնական որոշում է կայացրել, հաշվի առնելով այն հանգամանքը, որ կառավարությունը գազի գինը սուբսիդավորելու է 30 տոկոսով, 1 խորանարդ մետր գազի դիմաց որպես նոր գին սահմանել 156 դրամ՝ ներառյալ ավելացված արժեքի հարկը:
