Մարզպետների մասնակցությամբ այսօր կայացած խորհրդակցությանը ՀՀ փոխվարչապետ, տարածքային կառավարման նախարար Արմեն Գևորգյանը տեղեկություններ ներկայացրեց հունիսի 5-ին կայացած Ազգային անվտանգության խորհրդի նիստում քննարկված տեղական ինքնակառավարման ինստիտուցիոնալ ամրապնդման հարցերի մասին: Պայմանավորվածություններ ձեռք բերվեցին նիստում ընդունված որոշումների հետ կապված անելիքների մասով:
Քննարկվեցին նաև հողօգտագործողներին մատչելի գնով պարարտանյութ և դիզելային վառելիք տրամադրելու պետական ծրագրերի շրջանակում պարարտանյութի և դիզվառելիքի բաշխման գործընթացի վերահսկողությանն առնչվող հարցեր: Կարևորվեց գործընթացի նկատմամբ վերահսկողության առավել արդյունավետ մեխանիզմների կիրառումը:
Փոխվարչապետը հանձնարարեց աջակցություն ցուցաբերել ՀՀ ֆինանսների նախարարության Ֆինանսական վերահսկողության տեսչության և Տարածքային կառավարման նախարարության ներկայացուցիչներից կազմված աշխատանքային խմբերին, որոնք ուսումնասիրություններ են իրականացնում մարզերում` ծրագրերի նպատակային իրականացման, գործող մեխանիզմների արդյունավետության հետ կապված խնդիրները պարզելու, ինչպես նաև հնարավոր խախտումները բացահայտելու նպատակով: Պայմանավորվածություն ձեռք բերվեց, որ բաշխման գործընթացի վերահսկողության մեխանիզմների արդյունավետության վերաբերյալ մարզպետներն առաջարկություններ կներկայացնեն կառավարությանը:
Խորհրդակցությանը քննարկվեցին նաև մարզերի կրթական հաստատություններում ուսումնական տարվա ավարտի և գալիք ուսումնական տարվա նախապատրաստման հետ կապված վարչական աշխատանքների կազմակերպման հարցեր: Քննարկվեցին նաև ընթացիկ մի շարք այլ խնդիրներ, հայտնում է նախարարության հասարակայնության հետ կապերի բաժինը:
