Մարտի 1-ի հարցը չի փակվել, պնդում է ԱԺ ՀԱԿ խմբակցության պատգամավոր Գագիկ Ջհանգիրյանը: Այսօր խորհրդարանում ավանդական հայտարարությունների ժամին նա ասաց, որ խնդիրը մեռյալ կետից տեղաշարժելու նպատակով ԱԺ նախագահ Հովիկ Աբրահամյանին առաջարկում են կազմակերպել լսումներ: Նա նշեց, որ իրենք համաձայն են նաև փակ լսումների։
«Հուսով ենք, որ լսումների անցկացումը ժամանակավոր հանձնաժողովի ստեղծմանը դեմ քվեարկած քաղաքական մեծամասնության պատգամավորներին կվերահամոզի հիմնավորվածության և արդարացիության հարցում»,- ասաց նա՝ անդրադառնալով խորհրդարանական մեծամասնության կողմից մերժված Մարտի 1-ի դեպքերի ժամանակավոր հանձնաժողով ստեղծելու հարցին:
Գագիկ Ջհանգիրյանն ընդգծեց, որ իրենց խմբակցությունը հնարավոր բոլոր միջոցներով շարունակելու է հետապնդել Մարտի 1-ի սպանությունների լիարժեք բացահայտման և պատասխանատվության ենթարկելու խնդիրը:
