«Չնայած, որ Լեռնային Ղարաբաղի հակամարտության կարգավորման շուրջ պայմանավորվածություն չի ձեռք բերվել, հայկական կողմը դրական է գնահատում Հայաստանի եւ Ադրբեջանի նախագահների փետրվարի 10-11 Ռամբույեում կայացած բանակցությունների շարունակման փաստը»,-PanARMENIAN.Net-ի թղթակցին է հայտարարել է Հայաստանի նախագահի մամլո քարտուղար Վիկտոր Սողոմոնյանը: Անդրադառնալով ադրբեջանական ԶԼՄ-ների հաղորդագրություններին` Վ.Սողոմոնյանը հայտարարել է, որ Երեւանը աննպատակահարմար է համարում մեկնաբանել ադրբեջանական կողմի հայտարարությունները, քանի որ դրանք վերաբերում են փակ բանակցային գործընթացի մանրամասներին եւ միայն մասամբ են համապատասխանում իրականությանը, իսկ «ադրբեջանական ԶԼՄ-ների որոշ հրապարակումներ այնքան անլուրջ են, որ կարիք չկա դրանք մեկնաբանել»: ՀՀ նախագահի մամլո քարտուղարը հաստատել է տեղեկատվությունն այն մասին, որ Ռամբույեի հանդիպման նախօրեին տեղի է ունեցել Հայաստանի նախագահ Ռոբերտ Քոչարյանի հեռախոսազրույցը ԱՄՆ պետքարտուղար Քոնդոլիզա Ռայսի հետ, որի ընթացքում քննարկվել են ղարաբաղյան հակամարտության կարգավորման հեռանկարները: