Ջավախահայ քաղաքական գործիչ, նախկին քաղբանտարկյալ Վահագն Չախալյանի եղբայրը` Արմեն Չախալյանը, երկու ամսով կալանավորել է՝ հունիսի 28-ին Նինոծմինդայի շրջանի Գոնդուրա գյուղում տեղի ունեցած միջադեպի պատճառով: Այս մասին PanARMENIAN.Net-ի թղթակցի հետ զրույցում հայտնեց Վահագն Չախալյանը: Նա նշեց, որ Արմեն Չախալյանին խուլիգանություն կատարելու մասին մեղադրանք են ներկայացրել:
Նրա խոսքով` Արմեն Չախալյանը դատարանում չի ընդունել իր մեղքը, սակայն առանց փաստական հիմքերի դատարանը նման որոշում է կայացրել: Մեզ հետ զրույցում նա նշեց, որ մի քանի րոպեով տեսակցել է եղբոր հետ, նրան ծեծել են և դեմքին վնասվածքներ են եղել: Արմեն Չախալյանը դատարանին հայտնել է, որ այդ վնասվածքները նա ստացել է ձերբակալութան ժամանակ և պետք է հետաքննություն իրականացվի:
«Արմենը պատմեց, որ հարցաքննության ժամանակ իրեն գործի հետ կապված որևէ հարց չեն տվել: Հետաքրքրվել են, թե ինչով է զբաղվում, ես ինչով եմ զբաղվում: Քննչական մարմինը որևէ փաստ չի հավաքել, մենք ավելի շատ հիմքեր ենք հավաքել»,- ասաց Վահագն Չախալյանը և հույս հայտնեց, որ անաչառ քննություն կլինի և իրականությունը կպարզվի: Վահագն Չախալյանն ընդգծեց, որ ինքը շարունակելու է իր գործունեությունը, իսկ Արմենի միակ մեղավորությունն այն էր, որ գնացել է այդ միջադեպի վայրը:
Նա նշեց, որ Ջավախքում տեղի ունեցող իրադարձությունները ներկայիս իշխանություններին ձեռնտու չեն, սակայն ինչ-որ գործընթացներ են գնում Ջավախքում:
Հիշեցնենք, որ շաբաթ օրը միջադեպ էր տեղի ունեցել և Վրաստանի իրավապահ մարմինները երիտասարդների էին բերման ենթարկել: Նրանց թվում էր նաև ջավախահայ ակտիվիստ, նախկին քաղբանտարկյալ Վահագն Չախալյանի եղբայրը` Արմեն Չախալյանը, ով գնացել էր վեճը հարթելու:
