Հայաստանի նախագահ Ռոբերտ Քոչարյանն այսօր ընդունել է հրաժեշտի այցով Հայաստան ժամանած Հարավային Կովկասի հարցերով ԵՄ հատուկ ներկայացուցիչ Հեյկի Տալվիտիեին, հաղորդում է նախագահի մամլո ծառայությունը: Ռ.Քոչարյանը բարձր է գնահատել ԵՄ հատուկ ներկայացուցչի եռամյա գործունեությունը, եւ նշել, որ նաեւ նրա ակտիվ մասնակցությամբ Հայաստան-Եվրամիություն հարաբերությունները ձեռք են բերել ավելի համակարգված բնույթ: Հայաստանի նախագահը վստահություն է հայտնել, որ երկկողմ գործակցության օրակարգն առաջիկայում ավելի կընդլայնվի: Կողմերը մտքեր են փոխանակել նաեւ ղարաբաղյան հակամարտության կարգավորման, Հայաստանի ու Ադրբեջանի նախագահների` Ռամբույեում կայացած հանդիպումից հետո ստեղծված կացության, ինչպես նաեւ տարածաշրջանի երկրների հետ համագործակցության վերաբերյալ: