Ադրբեջանի ԶՈՒ կողմից վերահսկվող տարածքում հայտնվել է 1 զինծառայող, իսկ ականի վրա որևէ հայ զինծառայող չի պայթել: Այս մասին PanARMENIAN.Net-ի թղթակցի հետ զրույցում ասաց Արցախի ՊՆ մամուլի քարտուղար Սենոր Հասրաթյանը` հերքելով ադրբեջանական լրատվամիջոցների տարածած տեղեկությունը, թե իրենց կողմում հայտնվել են 2 հայ զինծառայողներ, որոնցից մեկը փախչելու փորձի ժամանակ պայթել է ականի վրա:

«Այդ տեղեկությունն ադրբեջանական քարոզչամեքենայի երևակայության արդյունք են և չեն համապատասխանում իրականությանը», - ասաց Սենոր Հասրաթյանը:

Ավելի վաղ ԼՂՀ ՊԲ մամուլի ծառայությունը հայտնել էր, որ օգոստոսի 7-ի լույս 8-ի գիշերը, ժամը 3:00-ի սահմաններում, ծառայությունն իրականացնելու ժամանակ, ըստ նախնական տեղեկությունների՝ տեղանքում չկողմնորոշվելու հետևանքով 1991թ. ծնված շարքային զինծառայող Հակոբ Գևորգի Ինջիղուլյանը հատելով ղարաբաղա-ադրբեջանական սահմանը, հայտնվել է հակառակորդի պահպանության տակ գտնվող տարածքում: